शेठ गोविंद साबळे स्मृतीदिन, जागतिक मानसिक आरोग्य दिन आणि व्यावसायिक विकास उपक्रमांतर्गत ‘ताण व्यवस्थापन : भावनिक स्थैर्याची जडणघडण’ विषयावर कार्यशाळा सासवड प्रतिनिधी :बापू मुळीक मुख्य संपादक पुरंदर प्राईम न्यूज: सासवड (ता. पुरंदर)– पुणे जिल्हा शिक्षण मंडळाच्या शेठ गोविंद रघुनाथ साबळे फार्मसी महाविद्यालय, सासवड येथे दि. ९ ऑक्टोबर २०२५ रोजी “श्री शेठ गोविंद साबळे स्मृतीदिन”, “जागतिक मानसिक आरोग्य दिन” आणि “व्यावसायिक विकास उपक्रम”या त्रिसंधी निमित्ताने “ताण व्यवस्थापन : भावनिक स्थैर्याची जडणघडण” या विषयावर एक दिवसीय कार्यशाळेचे आयोजन करण्यात आले.ही कार्यशाळा महाविद्यालयातील शिक्षक व शिक्षकेत्तर कर्मचाऱ्यांच्या सर्वांगीण व्यक्तिमत्व विकासासाठी राबविण्यात आली. कार्यशाळेचे उद्दिष्ट मानसिक आरोग्याचे महत्त्व अधोरेखित करून, कार्यक्षेत्रातील ताणतणावाचे व्यवस्थापन आणि भावनिक स्थैर्य वाढविण्यासाठी उपयुक्त तंत्रांची ओळख करून देणे हे होते.कार्यक्रमाची सुरुवात दीपप्रज्वलनाने झाली. या वेळी प्रमुख पाहुणे म्हणून श्रीकांत लक्ष्मीशंकर आणि जया नलगे, सदस्य – मासूम फाउंडेशन ,सासवड उपस्थित होते. त्यांनी ताणमुक्त जीवनशैली, आत्मसंयम, सकारात्मक दृष्टिकोन आणि मानसिक आरोग्याच्या संवर्धनाचे महत्त्व याविषयी मार्गदर्शन केले.कार्यक्रमाचे अध्यक्षस्थान महाविद्यालयाच्या प्राचार्या डॉ. राजश्री चव्हाण यांनी भूषविले. त्यांनी आपल्या अध्यक्षीय भाषणात जागतिक मानसिक आरोग्य दिनाच्या पार्श्वभूमीवर शिक्षक व शिक्षकेत्तर कर्मचाऱ्यांमधील भावनिक स्थैर्य व मानसिक संतुलनाचे महत्त्व अधोरेखित केले. त्यांनी सांगितले की, “आधुनिक शैक्षणिक व व्यावसायिक जीवनात वाढलेले ताणतणाव हे अपरिहार्य आहेत, मात्र योग्य भावनिक बुद्धिमत्ता आणि सकारात्मक विचारसरणीच्या माध्यमातून त्याचे व्यवस्थापन करणे आवश्यक आहे.”कार्यक्रमाचे सूत्रसंचालन प्रा .एस. एम. देशमुख यांनी उत्तमरीत्या पार पाडले, तर प्रा. पी. के. म्हस्के यांनी आभार प्रदर्शन केले.कार्यक्रमाचे यशस्वी आयोजन सांस्कृतिक विभाग प्रमुख डॉ. प्रज्ञा जगताप ,प्रा. दीपाली जगताप आणि प्रा. एस. बी. बाठे यांनी केले.या कार्यक्रमास महाविद्यालयातील सर्व शिक्षक, शिक्षकेत्तर कर्मचाऱ्यांनी उत्स्फूर्त सहभाग नोंदविला. कार्यक्रमाचे नियोजन आणि मार्गदर्शन महाविद्यालयाच्या प्राचार्या डॉ. आर. एस. चव्हाण यांच्या नेतृत्वाखाली पार पडले.