शिवसेना (उद्धव बाळासाहेब ठाकरे) तालुकाप्रमुख अभिजीत जगताप यांचा इशारागॅस पुरवठा सुरळीत न झाल्यास तीव्र आंदोलन छेडणार सासवड प्रतिनिधी: बापू मुळीक मुख्य संपादक पुरंदर प्राईम न्यूज: पुरंदर तालुक्यात घरगुती तसेच व्यावसायिक गॅस सिलेंडरचा तीव्र तुटवडा निर्माण झाला असून सर्वसामान्य नागरिकांना मोठ्या अडचणींचा सामना करावा लागत आहे. गॅस एजन्सीसमोर दररोज लांबच लांब रांगा लागत असून, कडक उन्हात तासन्तास उभे राहण्याची वेळ नागरिकांवर येत आहे. या परिस्थितीमुळे महिला, ज्येष्ठ नागरिक आणि कामगार वर्ग विशेषतः त्रस्त झाला आहे.या गंभीर परिस्थितीची दखल घेत शिवसेना (उद्धव बाळासाहेब ठाकरे) पक्षाचे तालुकाप्रमुख अभिजीत जगताप यांनी तहसीलदारांना निवेदन देत तात्काळ उपाययोजना करण्याची मागणी केली आहे. गॅस वितरणासाठी ठोस व सुटसुटीत वेळापत्रक तयार करून त्याची प्रभावी अंमलबजावणी करावी, तसेच गॅस एजन्सी, वितरक आणि ग्राहक यांच्यात योग्य समन्वय साधावा, असे त्यांनी नमूद केले.गॅस एजन्सीसमोरील प्रचंड गर्दीमुळे नागरिकांच्या आरोग्याचा प्रश्नही गंभीर बनला आहे. भर उन्हात दीर्घकाळ थांबल्याने आरोग्यावर विपरीत परिणाम होण्याची शक्यता व्यक्त होत आहे. दरम्यान, एका वयोवृद्ध व्यक्तीने रांगेतून मदतीसाठी संपर्क साधल्यानंतर अभिजीत जगताप यांनी तत्काळ तहसील कार्यालयात धाव घेत प्रशासनाचे लक्ष वेधले.प्रशासनाने या समस्येकडे तातडीने लक्ष न दिल्यास शिवसेना (उद्धव बाळासाहेब ठाकरे) पक्षाच्या वतीने मोठ्या प्रमाणावर उग्र जनआंदोलन छेडण्यात येईल, असा इशारा तालुकाप्रमुख अभिजीत जगताप यांनी दिला आहे.